Њујорк Тајмс тврди: Претседателот го напуштил НАТО самитот во Анкара со стариот Air Force One, наместо со новиот авион подарок од Катар
Американскиот претседател Доналд Трамп на почетокот на јуни поради иранска закана ненадејно го заменил авионот со кој го напуштил самитот на НАТО во Анкара, летaјќи со постариот Air Force One наместо со оној што му го подарил Катар, пишува во саботата Њујорк Тајмс.
Повикувајќи се на анонимни извори, американскиот весник пишува дека заканата се појавила додека Трамп учествувал на собирот на НАТО. Во турската престолнина претходно допатувал со новиот Боинг 747-8, подарок од Катар, кој според наводите нема напредни одбранбени способности како стариот Air Force One.
Замена на авионот и официјално објаснување
По предупредувањето од тајните служби, Трамп го променил авионот, а потоа тврдел дека замената била направена за да им се даде можност на американските војници во Британија да го разгледаат новиот авион, пишува Тајмс.
Од Турција Трамп тргнал со стариот авион, а потоа во Обединетото Кралство се качил во новиот претседателски авион, со кој продолжил кон Вашингтон.
Истрага за истекување информации
Њујорк Тајмс претходно овој месец објави дека властите се сомневаат во безбедносните способности на млазниот авион што му го подарила блискоисточната држава на републиканецот.
Властите на тие написи одговориле со истрага за истекување информации, барајќи сведочење на неколку новинари пред порота, како и предавање на листата на нивните повици и на нивните семејства.
Трамп минатиот викенд признал дека на новиот авион му недостасуваат некои карактеристики што ги имаат старите претседателски модели на Боинг, одговарајќи на новинар кој забележал недостаток на противракетна одбрана. Рече дека катарскиот авион наскоро ќе биде „максимално опремен“.
