Американскиот претседател Доналд Трамп изјави дека не верува оти Русија и Кина го снабдуваат Иран со оружје, наведувајќи дека лично добил уверувања од претседателите на двете земји дека тоа нема да се случи.
Во објава на својата социјална мрежа Truth Social, Трамп посочи дека за време на неодамнешната средба во Пекинг, кинескиот претседател Си Џинпинг му рекол дека Кина, како и нејзините компании, нема да продаваат оружје на Исламската Република Иран.
„Му верувам на неговиот збор и му правам многу голема услуга“, напиша Трамп.
Тој додаде дека слично уверување добил и од рускиот претседател Владимир Путин, кој, според него, исто така рекол дека Москва нема да испорачува оружје за Иран.
Трамп истакна дека САД не ѝ продаваат директно оружје на Украина, туку на земјите-членки на НАТО, кои ја плаќаат целосната цена, додавајќи дека понатамошната употреба на тоа оружје не е под американска контрола.
Според американскиот претседател, доколку Русија или Кина сепак го вооружуваат Иран, тоа би било сериозна грешка.
„Ако го прават тоа, тоа би било многу лошо за нив. Сигурно не би било во нивен интерес“, порача Трамп.
Неговите изјави доаѓаат само неколку дена откако американскиот министер за одбрана Пит Хегсет пред Сенатот изјави дека Русија и Кина, на различни нивоа, придонеле за дел од активностите на Иран за време на воениот конфликт.
Хегсет рече дека САД работат на спречување на таквите активности, но нагласи дека деталите за нивниот обем и начин на реализација остануваат доверливи поради безбедносни причини.
…
