Украинските напади со беспилотни летала во изминатите денови сè повеќе се насочуваат кон логистичките центри на Wildberries, најголемата руска платформа за онлајн-трговија, која често се опишува како руски еквивалент на Amazon.
Во серијата напади од 18 јули наваму погодени се повеќе магацини и логистички комплекси на компанијата во различни делови на Русија, а руските власти и самата компанија потврдија жртви, повредени и значителна материјална штета.
Според досега објавените податоци, само во првите напади врз објектите во Електростал и Котовск загинале осум лица, а десетици биле повредени. На 22 јули бил погоден и центарот во Краснодар, каде загинала една вработена, додека биле регистрирани и повеќе повредени.
Напади беа регистрирани и врз објекти во Невиномиск, регионот Воронеж, како и во Ленинградската област. Wildberries по дел од нападите привремено ја прекина работата во погодените центри.
Размерите на штетата сè уште се проценуваат, а бројките се менуваат со новите напади. Анализа на рускиот весник „Комерсант“, објавена на 23 јули, проценуваше дека дотогаш биле погодени околу 552.000 квадратни метри магацински простор, што претставувало приближно 10 проценти од логистичкиот капацитет на Wildberries. Околу 444.000 квадратни метри, според истата проценка, станале неупотребливи.
Оттогаш беа пријавени дополнителни напади, поради што конечниот размер на штетата може да биде значително поголем.
На социјалните мрежи и во украински извори се појавуваат проценки дека во период од околу една недела биле погодени девет до десет објекти и дека засегнатиот простор достигнува околу 1,15 милиони квадратни метри, односно приближно 20 проценти од мрежата на компанијата. Овие повисоки бројки, сепак, засега не се независно потврдени во целост.
Финансиската штета исто така може да биде огромна. Според проценките што ги пренесуваат руските медиуми, вредноста на оштетените објекти уште пред последните напади се проценувала на околу 60 милијарди рубљи, без да се пресмета целата уништена стока и загубите на продавачите што ја користат платформата.
Wildberries е еден од најголемите руски работодавци и има централна улога во онлајн-трговијата во земјата. Поради тоа, последиците не ги чувствува само компанијата, туку и голем број мали и средни трговци кои ги складираат и продаваат своите производи преку нејзината инфраструктура.
Киев ги оправдува нападите со тврдење дека дел од логистичката инфраструктура на Wildberries се користи за поддршка на руските вооружени сили. Москва го отфрла тоа и тврди дека станува збор за цивилна инфраструктура и дека компанијата не транспортира воени материјали.
Без оглед на спротивставените тврдења за намената на објектите, серијата напади веќе има значително влијание врз една од најголемите логистички и трговски мрежи во Русија, а целосните економски последици ќе можат да се проценат дури откако ќе биде утврден конечниот обем на штетата.
