Претседателот на Србија, Александар Вучиќ, изјави дека нема намера да ја напушти земјата доколку неговата Српска напредна партија (СНС) ги загуби претстојните избори, за чии можни термини во последните месеци сè почесто се говори во српската јавност.
Гостувајќи на телевизијата „Прва“, Вучиќ зборуваше за можниот изборен календар и оцени дека претседателските избори најверојатно би се одржале во јануари 2027 година, доколку парламентарните бидат распишани за октомври.
„Ако во октомври има парламентарни избори, можно е претседателските да бидат на крајот на декември или почетокот на јануари. Доколку парламентарните избори бидат во ноември, тогаш претседателските сигурно ќе бидат во јануари или можеби најдоцна во почетокот на февруари“, изјави Вучиќ.
Предвремени избори бараат студентското движење и дел од јавноста во Србија, во услови на повеќемесечни антивладини протести. Протестите започнаа по трагедијата во Нови Сад во 2024 година, кога при уривање на настрешницата на железничката станица загинаа 16 лица.
Демонстрантите ја обвинуваат власта за корупција и нефункционирање на институциите, додека студентското движење најави дека на изборите ќе настапи со сопствена листа.
Вучиќ, пак, тврди дека изборната листа на СНС ќе има значително повеќе млади кандидати од студентската.
„Ако граѓаните сакаат да гласаат за младост и иднина – ќе можат да гласаат за СНС. Ние ќе бидеме неспоредливо помлада листа од нивната, а јас ќе бидам меѓу постарите“, рече Вучиќ.
Тој додаде дека со гордост ќе биде дел од листата, без оглед на тоа на која позиција ќе биде поставен.
Говорејќи за можноста СНС да ги загуби изборите, српскиот претседател порача дека не се плаши од изборен пораз и дека, доколку противниците победат, ќе им честита, но истовремено јавно ќе го каже своето мислење за новата власт.
„Можно е да ги изгубиме изборите, но сепак ќе ги преброиме гласовите. Кога ќе победат на изборите, ќе им честитам и истата вечер ќе кажам дека најлошите можни дошле на власт. Ќе им се смеам во лице цело време – и од притвор, и од затвор, и од гроб, пркосно и гордо“, изјави Вучиќ.
Тој рече дека нема страв, освен од Бога, историскиот суд и судот на сопствениот народ.
Во интервјуто Вучиќ упати критики и кон Европа и САД поради поддршката што студентското движење ја добива од дел од меѓународната јавност. Тој ги обвини западните земји дека поддржуваат луѓе кои, според неговото тврдење, би можеле да го нарушат правниот поредок во Србија.
Истовремено, призна дека власта мора внимателно да ги слуша пораките на незадоволните граѓани и оцени дека дел од критиките се оправдани, особено кога станува збор за корумпирани и арогантни поединци во системот.
Вучиќ соопшти и дека преку платформата „Кој си бре ти?“, наменета за пријавување корупција и злоупотреба на овластувањата, досега пристигнале околу 10.000 пријави.
Според него, досега било одговорено на приближно 3.500 од поднесените пријави.
