Љубиша Каровиќ (61) од Србија преживеа вистински хорор на лет на компанијата „Рајанер“ кога прозорецот до неговото седиште експлодираше на 6.000 метри височина и речиси го исфрли од авионот. Наместо извинување и отштета, од компанијата добил само понуда за нов лет.
Инцидентот се случил пред две недели, на летот FR1879 од Солун до Меминген. Каровиќ спиел кога дошло до експлозија на прозорецот. Поради наглото декомпресирање, тој бил делумно извлечен надвор од авионот.
Од сигурна смрт го спасиле неговата сопруга Светлана и другите патници, кои во паника му ги држеле нозете додека тој висел дијагонално од леталото. Според неговата сопруга, екипажот останал во паника и не реагирал.
„Изгледаа поисплашени од нас. Само патниците помогнаа, беа храбри“, изјавила Светлана.
Каровиќ во инцидентот се здобил со тешки изгореници од триење, модринки на раката и градите и веднаш се онесвестил. „Сето ова е како кошмар. Не можам да спијам. Штом ги затворам очите, слушам експлозија“, раскажува тој.
Пилотот по инцидентот веднаш го спуштил авионот и се вратил во Солун, каде патникот бил пренесен со брза помош.
Иако поминаа две недели, Каровиќ тврди дека никој од „Рајанер“ не го контактирал лично.
„Добивме само е-пошта на име на мојот син кој ги резервираше билетите. Прашаа дали сакаме нов лет и како сум. Никој не ме повика да покаже загриженост“, вели тој.
Србинот сега ангажирал адвокат и преку грчкиот адвокат Василис Цијарас ќе бара голема отштета. Случајот веќе го истражува американскиот NTSB, а од „Рајанер“ велат дека нема да коментираат до завршување на истрагата, тврдејќи дека екипажот „завршил одлична работа“.
…
