Околу 2.000 туристи се евакуирани од јужниот дел на грчкиот остров Крит поради голем шумски пожар кој продолжува да се шири, додека грчките власти спроведуваат превентивни евакуации во погодените туристички места и населени подрачја.
Туристите од загрозените области се префрлени на побезбедни локации, а 29 лица, главно посетители кои се наоѓале на плажи, биле евакуирани по морски пат.
Во областа Ираклион, локалните власти отворија спортска сала во Мирес за привремено сместување на евакуираните, каде што се обезбедени душеци, основни средства и помош за престој.
Пожарот најмногу ја зафати областа Ретимно, каде пожарникарите се бореа со огнената стихија во текот на целата ноќ. Силните ветрови дополнително ја отежнуваат ситуацијата, а противпожарната линија се протега на околу 20 километри.
Освен на Крит, активни жаришта има и на други делови од Грција, меѓу кои и островот Парос и подрачја на копното.
Во борбата со пожарите има и човечки жртви. Тројца пожарникари го загубиле животот – двајца на Крит и еден на Пелопонез, додека двајца волонтери се здобиле со полесни повреди.
Грчките власти предупредуваат дека опасноста од нови пожари останува многу висока поради екстремните временски услови, високите температури и сувата вегетација. Противпожарните служби се ставени во состојба на зголемена подготвеност.
Надлежните апелираат туристите да ги следат упатствата на локалните власти, веднаш да постапат доколку биде наредена евакуација и да избегнуваат движење низ области со густ чад или активен пожар.
На посетителите им се препорачува редовно да ги следат официјалните информации за состојбата со пожарите, да имаат подготвени лични документи и неопходни работи, како и да останат во контакт со туристичките агенции доколку патуваат преку организирани аранжмани.
…
