Украинскиот претседател Володимир Зеленски изјави дека Украина останала без пресретнувачки ракети за американските системи за противвоздушна одбрана „Patriot“, по уште еден масовен руски ноќен напад во кој загинаа најмалку девет лица, а над 30 се повредени.
Според Зеленски, Русија во текот на ноќта лансирала 35 ракети, од кои 27 биле балистички, како и 185 дронови од различни типови. Главна цел бил Киев, а напади биле извршени и врз регионите Дњепропетровск, Суми, Харков и Полтава.
Тој посочи дека украинската противвоздушна одбрана успеала да пресретне само една балистичка ракета, бидејќи земјата повеќе нема пресретнувачки ракети за системите „Patriot“, кои се сметаат за најефикасна заштита од ваков тип закани.
„Од клучно значење е нашите партнери да разберат дека овие капацитети ни се потребни сега, а не во некое хипотетичко сценарио. Секој пакет пресретнувачи спасува човечки животи, а секоја ноќ без нив носи нови жртви“, порача Зеленски.
Во нападите биле оштетени 18 станбени згради, едно училиште, литванската амбасада и друга инфраструктура, додека спасувачките служби продолжиле со гаснење на пожарите во Киев и околината.
Во меѓувреме, американскиот претседател Доналд Трамп изјави дека САД сè уште не дале дозвола Украина да произведува ракети за системите „Patriot“ по лиценца.
„Не сме дале согласност. Разговараме за тоа“, изјави Трамп, додавајќи дека Вашингтон мора да биде внимателен при споделувањето на напредна воена технологија.
Тој нагласи дека трансферот на ваква технологија носи долгорочни ризици и затоа САД внимателно ги разгледуваат сите можни одлуки поврзани со лиценцираното производство на напредно американско оружје.
…
