По повод Денот на Републиката – 2 Август, претседателот на Демократската унија за интеграција (ДУИ), Али Ахмети, упати честитка во која се осврнува на историското значење на Илинден, но и на актуелните политички состојби во земјата, нагласувајќи дека слободата и заедничката иднина можат да се градат само врз принципите на еднаквост, почит и соживот.
Во својата порака, Ахмети истакнува дека 2 Август потсетува на еден од највозвишените идеали од заедничката историја – уверувањето дека државата не треба да се гради врз надмоќ, туку врз рамноправност меѓу сите нејзини граѓани.
Според него, духот на Крушевската Република останува симбол на држава во која Македонците, Албанците и сите други заедници ќе ја делат одговорноста за заедничката иднина.
Ахмети оценува дека, повеќе од еден век подоцна, државата се оддалечува од тој идеал. Наместо партнерство и инклузивност, како што наведува, повторно се промовира логика на доминација и исклучување.
Тој тврди дека Албанците се сè повеќе маргинализирани во повеќе клучни области, меѓу кои државната администрација и институциите, дипломатијата и безбедносниот сектор, правосудството, здравството, образованието, економијата, како и во процесите на донесување стратешки одлуки.
Во честитката се посочува и дека Охридскиот рамковен договор, кој Ахмети го нарекува современо продолжение на Крушевскиот манифест, денес се соочува со обиди за негово деградирање.
Тој наведува дека нападите врз службената употреба на албанскиот јазик, укинувањето на механизмот за правична застапеност – познат како балансер, слабеењето на механизмите за заштита од мајоризација и, како што вели, промовирањето на моноетнички концепт претставуваат сериозни сигнали за погрешниот правец во кој се движи државата.
Ахмети дополнително оценува дека овие политики се овозможени и со поддршка од дел од албанските претставници во актуелната власт, за кои вели дека наместо да ги застапуваат интересите на граѓаните, избрале потчинување и немаат легитимитет да зборуваат во име на еднаквоста.
Во својата порака тој нагласува дека определбата на Албанците останува непроменета – заедничка, унитарна, демократска и европска Северна Македонија, во која сите граѓани ќе бидат еднакво вреднувани и ќе имаат еднакви права.
Ахмети порачува дека иднината на државата не треба да се гради врз поделби, страв и исклучување, туку врз меѓусебна почит, еднаквост и искрено партнерство, како единствен пат кон праведно општество, цврсто втемелено во НАТО и интегрирано во Европската Унија.
