Русија во изминатата недела значително ги интензивирала нападите врз Украина, лансирајќи околу 1.900 беспилотни летала, речиси 1.600 наведувани воздушни бомби и 144 ракети од различен тип, меѓу кои и балистички ракети, соопшти украинскиот претседател Володимир Зеленски.
Според него, руските сили продолжуваат со масовни напади врз повеќе украински региони, при што денеска градот Суми бил погоден со наведувани воздушни бомби.
Во Бровари, во близина на Киев, едно лице загинало, а шестмина биле повредени во напад извршен со беспилотно летало.
Под постојан руски оган и натаму се наоѓаат Харков и околниот регион. Во денешниот напад бил погоден терминал на компанијата „Нова пошта“ во близина на Харков, при што едно лице го загубило животот.
Во текот на ноќта, руски напади биле регистрирани и во регионите Одеса, Запорожје и Дњепропетровск.
Зеленски предупреди дека Русија ја менува својата воена тактика и сè повеќе вложува во производство и употреба на балистички ракети, со цел дополнително да ги засили воздушните напади врз Украина.
Изјавата на украинскиот претседател е објавена преку неговиот официјален канал на Телеграм, заедно со видеоматеријал од последиците од нападите.
