Возачите кои патуваат во Грција треба да знаат дека таму не се санкционира само пречекорувањето на дозволената брзина, туку и неоправдано бавното возење, доколку тоа го попречува нормалното одвивање на сообраќајот.
Според грчките сообраќајни прописи, за ваков прекршок е предвидена парична казна од 30 евра. На автопатите и експресните патишта, покрај максималната, постои и минимална дозволена брзина, која изнесува 70 километри на час.
Доколку возилото не може да одржува таква брзина, возачот е должен да користи друг пат каде што е дозволено побавно движење. Минималната брзина е означена со кружен сообраќаен знак со сина подлога и бел број.
Согласно член 23 од грчкиот Закон за безбедност во сообраќајот, не е дозволено неоправдано попречување на сообраќајот со премногу бавно возење. Сепак, законот предвидува исклучоци. Казна нема да биде изречена доколку брзината е намалена поради лоша состојба на патот, неповолни временски услови или густ сообраќај, кога побавното возење е неизбежно.
Со оглед дека голем број македонски туристи во текот на летото патуваат во Грција, познавањето на овие правила може да помогне да се избегнат непотребни казни и проблеми во сообраќајот.
…
