Американскиот претседател Доналд Трамп упати нови остри критики кон иранското раководство, обвинувајќи го дека испраќа спротивставени пораки во врска со можните преговори меѓу двете земји.
Во објава на социјалните мрежи, Трамп изјави дека иранските власти приватно бараат средба со Соединетите Американски Држави, додека јавно тврдат дека воопшто не се водат никакви разговори.
„Иранското раководство е неверојатно дволично! Бараат средба, а истовремено отворено и гордо велат дека не водат никакви дискусии“, напиша Трамп.
Тој исто така изнесе тврдење дека американската морнарица има целосна контрола врз Ормутскиот теснец – една од најважните светски поморски рути за транспорт на нафта и природен гас.
Според Трамп, низ теснецот „ништо нема да помине“ доколку Иран не прифати договор со САД или, како што наведе, „целосно не се предаде“.
Неговите изјави доаѓаат во период на зголемени тензии меѓу Вашингтон и Техеран и продолжени несогласувања околу безбедноста во Персискиот Залив и иранската нуклеарна програма.
Засега нема официјална реакција од иранските власти на последните обвинувања и пораки на американскиот претседател.
