Украинскиот претседател Володимир Зеленски изјави дека украинските сили во текот на јули елиминирале повеќе од 30.000 руски војници, нагласувајќи дека бројката се темели исклучиво на случаи за кои, според него, постојат јасни видеодокази.
Во своето редовно вечерно обраќање, Зеленски посочи дека украинските единици на фронтот во јули неутрализирале вкупно 30.272 руски војници, при што во оваа бројка се вклучени и загинатите и тешко ранетите.
„Оваа бројка ги опфаќа само случаите за кои имаме јасни видеодокази“, рече Зеленски, додавајќи дека значителен дел од операциите биле изведени со употреба на беспилотни летала.
Тој оцени дека руските сили во просек губат околу 30.000 војници месечно и најави дека украинската армија ќе продолжи да го зголемува бројот на беспилотни летала на фронтот.
Во обраќањето, Зеленски им се заблагодари на украинските војници и на меѓународните партнери за поддршката, истакнувајќи дека системите за противвоздушна одбрана остануваат еден од најважните приоритети за земјата.
Изјавата доаѓа во време кога Русија изврши масовен напад со балистички ракети и беспилотни летала врз Украина. Според украинските власти, во нападите врз Киев и Киевската област загинале најмалку 15 лица, а 51 биле повредени.
Нападите следуваат и по изјавата на американскиот амбасадор во НАТО, Метју Витакер, кој рече дека долгорочниот договор за лиценцирано производство на ракети-пресретнувачи за системот Patriot во Украина нема да биде подготвен до претстојната зима.
Украинските тврдења за руските загуби засега не се независно потврдени, а Москва редовно не објавува официјални податоци за бројот на своите загинати и ранети војници.
