Во акциска контрола спроведена од Мобилната единица за безбедност на сообраќајот при Секторот за сообраќајни работи, на 5 август во периодот од 17:00 до 23:00 часот, на подрачјето на Тетово биле санкционирани вкупно 50 возачи на мопеди, мотоцикли и лесни електрични возила (тротинети) поради непочитување на сообраќајните правила и прописи.
Од Министерството за внатрешни работи информираат дека најголем дел од прекршоците се однесувале на управување без заштитен шлем, при што биле изречени 31 санкција. Дополнително, изречени се девет санкции за возачи на електрични тротинети, како и по една санкција за истечена осигурителна полиса, истечена регистрација на мотоцикл, управување без соодветна категорија, управување под дејство на алкохол и други прекршоци сторени од возачи на мопеди и мотоцикли. Изречени се и три мерки за останати сообраќајни прекршоци, како и едно барање против правно лице.
Во текот на акцијата, едно лице било лишено од слобода поради сомнение дека сторило кривично дело по член 297-а од Кривичниот законик – управување со мопед без да поседува возачка дозвола. Воедно, мопедот му бил одземен.
Полицијата привремено одзела и еден електричен тротинет, откако било утврдено дека со него управувало дете кое превезувало уште едно лице.
Од МВР најавуваат дека засилените сообраќајни контроли ќе продолжат и во наредниот период низ целата држава, со цел зголемување на безбедноста во сообраќајот и санкционирање на несовесните учесници. Истовремено, апелираат до сите возачи да ги почитуваат сообраќајните правила и прописи за побезбедни патишта за сите.
…
