Поранешниот врховен командант на украинската армија и актуелен амбасадор на Украина во Велика Британија, Валериј Залужни, оцени дека Русија развила противмерки за речиси целото западно вооружување што Украина го користи во војната.
Во разговор со новинари во Киев, Залужни изјави дека конфликтот во Украина ги открил слабостите на современите воени доктрини и дека НАТО мора суштински да го промени начинот на кој се подготвува за идни војни.
„Украина во 2026 година користеше речиси сите видови вооружување, освен ракетите ‘Томахавк’, нуклеарното оружје, носачите на авиони и авионите Ф-35 кои се дел од арсеналот на НАТО“, рече Залужни, додавајќи дека Русија успеала да најде одговор за голем дел од овие системи.
Тој нагласи дека и понатаму ја поддржува интеграцијата на Украина во НАТО и потсети дека уште во 2019 година се залагал украинските вооружени сили да се усогласат со стандардите на Алијансата.
Според Залужни, војната целосно ја трансформирала украинската армија, која стекнала големо искуство во современо војување и сега, според него, ги надминува дел од постојните воени концепти на НАТО.
„НАТО нема друг избор освен да премине на нови стандарди“, изјави тој, оценувајќи дека само со модернизација Алијансата ќе биде подготвена за евентуално членство на Украина.
Залужни повторно се заложи и за создавање нов безбедносен формат со седиште во Европа, кој би бил прилагоден на предизвиците на современите конфликти.
Неговите изјави доаѓаат по реакциите во јавноста по неговите претходни коментари дека Украина „никогаш“ нема да стане членка на НАТО. Од украинското Министерство за надворешни работи потоа порачаа дека неговите зборови биле извадени од контекст и дека стратешката цел на Киев за членство во Алијансата останува непроменета.
Залужни беше на чело на украинската армија од 2021 до 2024 година, а во јавноста често се споменува како потенцијален кандидат за идните претседателски избори во Украина.
