Осумте најголеми нафтени компании во светот оствариле вкупен профит од речиси 93 милијарди долари во вториот квартал од годинава, покажува анализата на британскиот весник „Гардијан“. Високите приходи се должат на растот на цените на нафтата, поттикнат од воените тензии меѓу Иран, Израел и САД, како и на зголемената побарувачка за енергија за време на екстремните топлотни бранови.
Меѓу компаниите што оствариле најголема заработка се Сауди Арамко, БП, Шел, Еквинор, ТоталЕнерџис, Ени, Шеврон и ЕксонМобил. Нивниот заеднички профит е речиси двојно поголем во споредба со истиот период минатата година, кога изнесувал нешто помалку од 50 милијарди долари.
Во просек, овие компании заработувале повеќе од 700.000 долари секоја минута. Истовремено, нивната вкупна пазарна вредност пораснала за околу 600 милијарди долари и надминала три трилиони долари.
Најголем добитник е саудиската државна компанија Сауди Арамко, која пријавила квартален нето-профит од над 33 милијарди долари, што претставува раст од 34 проценти во однос на претходната година.
Објавените финансиски резултати повторно ги засилија повиците од еколошките организации за воведување дополнителни даноци на неочекуваните профити на нафтените компании. Според нив, средствата треба да се искористат за справување со последиците од климатските промени и за забрзување на инвестициите во обновливи извори на енергија.
Од организацијата „Глобал витнес“ обвинија дека нафтените гиганти остваруваат огромни приходи додека милиони домаќинства се соочуваат со повисоки сметки за енергија и последиците од пожари, суши и екстремни температури.
