Технолошкиот гигант Apple продолжува да ја брани политиката за заштита на приватноста на своите корисници и одбива да им овозможи на безбедносните служби директен пристап до шифрираните податоци на клиентите.
Компанијата поднесе тужба пред британскиот суд против барањето на Владата на Велика Британија со кое се бара пристап до заштитените податоци на корисниците на услугата iCloud. Станува збор за барање кое предизвика голема дебата околу границата меѓу националната безбедност и правото на приватност.
Според британските прописи за истражни овластувања, технолошките компании можат да бидат задолжени да им овозможат на службите пристап до одредени податоци во случаи поврзани со борба против тероризам и други сериозни кривични дела.
Од Apple предупредуваат дека создавањето таканаречена „задна врата“ во системите за шифрирање би можело да ја намали безбедноста на сите корисници и да создаде ризик од злоупотреба и хакерски напади.
Компанијата посочува дека ги доставува податоците до надлежните органи кога постојат валидни законски барања, но не може да обезбеди директен пристап до содржините на уредите или до услуги заштитени со напредни системи за шифрирање.
Од Apple нагласуваат дека не постои механизам кој би бил достапен само за безбедносните служби, а недостапен за други лица. Според компанијата, доколку еднаш се создаде таков систем, постои ризик тој да биде искористен и од злонамерни актери.
Сличен став имаат и голем број експерти за сајбер-безбедност, кои предупредуваат дека слабеењето на заштитата на податоците може да ги изложи милиони корисници на дополнителни ризици.
…
