Полицијата во Србија разоткри криминална група осомничена за серија тешки кражби на луксузни патнички возила во повеќе населени места во Војводина.
Основното јавно обвинителство во Бачка Паланка, во координација со Полициската управа во Нови Сад и полициските одделенија во Суботица и Сомбор, соопшти дека се расветлени кражби извршени на подрачјата на Бач, Челарево, Гајдобра, Алекса Шантиќ и Ратково.
По налог на обвинителството се уапсени А.Б. (51) од Сомбор и Д.К. (41) од Кула, на кои им е одредено задржување до 48 часа. Тие се сомничат дека сториле пет кривични дела тешка кражба, како и уште едно дело поврзано со тешка кражба.
Осомничените биле сослушани во обвинителството на 4 август, но се бранеле со молчење. По сослушувањето, обвинителството доставило предлог за определување притвор до Основниот суд во Бачка Паланка.
Во тек е истрага во која ќе се собираат дополнителни докази и ќе се утврдуваат сите околности поврзани со кражбите, по што ќе биде донесена одлука за евентуално поднесување обвинение.
…
