Кина упати остро предупредување до Јапонија, повикувајќи ја владата во Токио да ја почитува волјата на своите граѓани и да не презема чекори кои би можеле да доведат до промени во нејзината досегашна политика кон нуклеарното оружје.
Пекинг порача дека Јапонија треба да ги исполни своите меѓународни обврски поврзани со непролиферацијата и да се откаже од, како што беше наведено, „играњето со оган“ кога станува збор за нуклеарното оружје.
Предупредувањето следува по објавувањето на анкета во Јапонија, според која 76 отсто од граѓаните ги поддржуваат трите ненуклеарни принципи – земјата да не произведува, да не поседува и да не дозволува распоредување нуклеарно оружје на својата територија.
Дополнително, 77 отсто од испитаниците се противат на воведување модел на „нуклеарно споделување“, кој би можел да подразбира распоредување американско нуклеарно оружје на јапонска територија.
Од кинеското Министерство за надворешни работи порачаа дека јапонските власти треба да ја земат предвид волјата на населението и да останат доследни на своите досегашни определби и меѓународни обврски.
Изјавата на Пекинг доаѓа во период на зголемени тензии меѓу двете земји. Во новиот јапонски одбранбен извештај, Кина е означена како најголем стратешки предизвик за Јапонија.
Токио во документот ја нагласува потребата од дополнително зајакнување на одбранбените способности и прилагодување кон новите форми на војување, вклучително и употребата на дронови и вештачка интелигенција.
Кинеските власти, пак, предупредуваат дека какво било отстапување од јапонската ненуклеарна политика би можело да има сериозни последици за регионалната безбедност и стабилност.
…
