Архиепископот Охридски и Македонски г.г. Стефан денеска во Охрид ја прими Големата повелба на хуманизмот, признание што му беше врачено по повод 40-годишнината од неговото замонашување.
Во своето обраќање по повод признанието, г.г. Стефан истакна дека вистинскиот хуманизам се состои во помагањето на другиот и во придонесот кон народите, посочувајќи ги како пример делото и мисијата на Светите браќа Кирил и Методиј, како и на Светите Климент и Наум.
„Нивното дело, нивната активност е всушност хуманизмот, помагање на другиот, помагање на народите“, порача архиепископот.
Говорејќи за симболиката на денешното признание, г.г. Стефан потсети дека се замонашил во 1986 година, токму на празникот на Свети Наум, додека 40 години подоцна Големата повелба на хуманизмот му е врачена на празник посветен на Свети Климент и на Светите Седмочисленици.
Тој нагласи дека Светите Климент и Наум, иако својата мисија ја извршувале од двете страни на Охридското Езеро, останале неразделно поврзани преку своите мисли, дела и духовна мисија.
„Секогаш заедно и во мислата, и во делата… продолжиле да бидат хумани, да бидат хуманисти, човеколубиви, а пред сè боголубиви“, рече г.г. Стефан.
Осврнувајќи се на четирите децении поминати во монашкиот и архиерејскиот живот, архиепископот изрази благодарност до верниот народ и до членовите на Светиот архиерејски синод за сето она што било постигнато во изминатиот период.
Како едно од најзначајните достигнувања, тој го издвои обновувањето на автокефалниот статус на Македонската православна црква – Охридска архиепископија, како и воспоставувањето односи со голем број православни цркви.
„Слава на Господа, и ги дочекавме, и ги доживеавме“, порача архиепископот.
Г.г. Стефан изрази надеж дека и во иднина ќе продолжи процесот на воспоставување односи со православните цркви со кои сè уште постојат отворени прашања поврзани со името и историјата на Македонската православна црква.
„Да се надеваме дека ќе го разбереме и нашето човеколубие, и нашиот хуманизам, дека ништо против другите не правиме правејќи за себе“, порача г.г. Стефан.
На крајот од своето обраќање, архиепископот се заблагодари за признанието и упати порака дека хуманизмот треба и понатаму да се негува преку заедничкиот придонес на сите.
„Да продолжи хуманизмот да живее со наша помош, со помош на сите нас“, порача Архиепископот Охридски и Македонски г.г. Стефан.
