На територијата на Македонија до 13 часот се регистрирани вкупно девет пожари на отворен простор, информира Центарот за управување со кризи.
Од нив, пет пожари сè уште се активни, еден е ставен под контрола, додека три се целосно изгаснати.
Активни пожари во моментов има на пет локации.
Во Општина Аеродром, кај селото Горно Лисиче, гори ниска вегетација, дрва и пченка.
Во Општина Илинден активен е пожар покрај автопатот Скопје–Велес, спроти бензинската пумпа „Макпетрол“, каде што е зафатена ниска вегетација.
Во Општина Босилово, кај селото Турново, гори стрниште.
Пожар е активен и во Општина Крива Паланка, на излезот од градот, каде што гори депонија.
Во Општина Гостивар, кај селото Симница, огнената стихија зафатила ниска вегетација, стрништа и грмушки.
Еден пожар е ставен под контрола.
Станува збор за пожарот во Општина Зелениково, над селото Зелениково, каде што беа зафатени шума и ниска вегетација.
Три пожари во текот на денот се изгаснати.
Во Општина Сарај, кај селото Грчец, беше зафатена ниска вегетација.
Во Општина Прилеп, пожарот кај Новите градски гробишта, каде што гореше ниска вегетација, е изгаснат.
Изгаснат е и пожарот во Општина Кичево, кај селото Црвивци, каде што било зафатено стрниште.
Според последниот пресек на Центарот за управување со кризи до 13 часот, состојбата е пет активни пожари, еден под контрола и три изгаснати.
