Македонската православна заедница во Австралија вчера торжествено ја одбележа храмовата слава на црквата „Света Петка“ во Рокдајл, Сиднеј, информира претседателот на Светскиот македонски конгрес, Тодор Петров.
На 8 август, кога Светата православна црква молитвено го одбележува споменот на Светата преподобномаченичка Параскева – Света Петка, голем број верници се собраа во истоимениот македонски православен храм за заеднички да го прослават патрониот празник.
По повод храмовата слава беше отслужена Света Божествена Литургија, со која чиноначалствуваше отец Гаврил Галев, во сослужение на протојереј Александар Ивановски, протојереј Томе Младеновски и старешината на храмот, јереј Владо Недески.
Посебен момент за македонските верници во Сиднеј беше присуството на чудотворната Абалакска икона на Пресвета Богородица од Сибир. Иконата специјално за оваа свечена пригода ја донесе отец Борис од Задграничната Руска Православна Црква.
Како што се наведува во објавата, присуството на чудотворната икона токму на патрониот празник претставувало особена духовна радост и благослов за храмот и за присутните верници.
Македонските верници имале можност молитвено да ѝ пристапат и да се поклонат пред иконата, барајќи застапништво, помош и закрила од Пресвета Богородица.
По завршувањето на празничната Света Литургија и молитвеното чествување на Света Петка, одбележувањето продолжило во црковната сала. Таму била приредена традиционална славска трпеза на љубовта за свештенството, верниците и останатите гости.
Во својата објава, претседателот на Светскиот македонски конгрес, Тодор Петров, упати и порака со желби за благослов и заштита на македонската православна заедница во Австралија.
„Нека по молитвите на Светата преподобномаченичка Параскева – Света Петка, и под мајчинскиот покров на Пресвета Богородица, Господ го чува и благословува овој свет храм, неговото свештенство, црковната општина и сиот верен македонски народ“, се наведува во објавата.
Одбележувањето на храмовата слава уште еднаш ја собра македонската заедница во Сиднеј околу црквата, која претставува едно од местата каде Македонците во Австралија ги негуваат својата православна вера, традиција и заедништво.
