Седумдесет и едногодишен скопјанец исчезнал вчера во водите на Преспанското Езеро, откако скокнал од чамец за да ги земе веслата што му паднале во водата.
Како што информира Министерството за внатрешни работи, случајот бил пријавен во СВР Битола околу 12:33 часот.
Двајца рибари кои успеале да излезат на брегот кај ресенското село Сливница пријавиле дека во езерото останале уште двајца нивни сопатници.
Според пријавеното, М.М. (71) од Скопје, околу 12:20 часот скокнал во езерото по веслата, но повеќе не излегол од водата.
Другиот рибар, Б.Ј. (71), исто така од Скопје, останал во чамецот. Поради ветерот, пловилото било однесено во правец на Крани, на оддалеченост од околу еден километар од брегот.
На местото излегле полициски службеници, а во потрагата по исчезнатиот 71-годишник е вклучена и специјализирана нуркачка екипа од САЕ „Тигар“.
Потрагата по исчезнатиот рибар продолжува.
