Српскиот претседател Александар Вучиќ предупреди дека светот се наоѓа на почетокот на голем конфликт, кој во иднина би можел дополнително да се прошири.
Во интервју за подкастот „MD MEETS“ на режисерот на „Аксел Спрингер“, Матијас Депфнер, Вучиќ изјави дека не очекува брзо воспоставување мир и оцени дека светот се движи кон уште поголема војна.
„Мислам дека сме на почетокот на поголема војна. Затоа се надевав дека некој досега ќе направи нешто за да воспостави мир. Тоа не се случи, ниту пак ќе се случи наскоро“, рече Вучиќ.
Говорејќи за војната во Украина, српскиот претседател оцени дека не очекува конфликтот да заврши во текот на оваа година, а можеби ниту до следната пролет. Според него, во моментов нема доволно простор за компромис бидејќи двете страни сакаат победа и пораз на спротивната страна.
Вучиќ повика на прекин на огнот и предупреди дека не треба да се чека целосно исцрпување на руските сили.
„Не ни треба пораз на која било страна, туку компромис“, порача српскиот претседател, додавајќи дека Русија е нуклеарна сила и дека не верува оти може лесно да биде поразена.
Тој се осврна и на идниот распоред на силите во светот, оценувајќи дека САД и Кина ќе останат клучни глобални актери, додека Европската Унија би можела да стане трет голем столб. Како други значајни сили ги наведе Русија, Индија, Турција, Пакистан и Саудиска Арабија.
Вучиќ зборуваше и за односите на Србија со Русија и Украина. Тој истакна дека Србија не е ничија марионета и дека Белград води сопствена политика, независно од ставовите на Москва, Киев или Вашингтон.
Во однос на посетата на украинскиот претседател Володимир Зеленски на Србија, Вучиќ рече дека разговорите биле корисни за двете земји. Тој посочи дека Србија има стратешка цел – членство во Европската Унија.
„Сите велеа дека имаме премногу столчиња и дека мора да избереме едно. Да, го избравме. Тоа е српското столче“, порача Вучиќ.
Тој истакна дека Србија ќе продолжи да ги одржува традиционалните односи со Русија, но истовремено ќе развива партнерства со Украина и со европските земји.
Вучиќ во интервјуто оцени дека светот влегува во период на нови сојузи и големи геополитички промени, при што предупреди дека идните конфликти би можеле да бидат уште поразорни доколку не се постигнат политички компромиси.
