Словенечкото Министерство за внатрешни работи откри сериозни пропусти во работата на полицијата во случајот со маж кој повеќе од година и пол се претставувал како полицаец и учествувал во официјални полициски постапки на аеродромот „Брник“.
Според извештајот од вонредниот надзор, лицето од април 2024 до септември 2025 година учествувало во најмалку 16 полициски постапки. Во одредени случаи се движело и во административните простории на полициската станица, каде што пристапот е ограничен поради обработка на доверливи податоци.
Особено загрижувачки е фактот што полицијата уште на 30 септември 2025 година добила информација дека лице се претставува како полицаец, користи полициски овластувања и носи оружје. Информацијата била оценета како веродостојна, но не била веднаш покрената постапка за внатрешна безбедност, ниту било информирано раководството на криминалистичката полиција.
На 9 октомври претпоставените добиле и втора информација, но лажниот полицаец продолжил со своите активности.
Случајот бил откриен на 15 октомври, кога лицето било препознаено на фотографии направени по несреќа на аеродромот, каде што учествувало во обезбедувањето на местото.
При претресот во полициската станица кај него биле пронајдени фалсификувана полициска легитимација, гасен пиштол и бележник во кој ги запишувал своите активности.
Токму бележникот бил еден од клучните докази дека тој подолг период активно се вклучувал во полициската работа.
Лицето претходно работело како обезбедување на аеродромот, поради што ги познавало полицајците и начинот на нивната работа. Пред нив се претставувало како помошен полицаец. Опремата што ја користело била набавена преку интернет, но се разликувала од онаа на вистинските полицајци.
Надзорот утврдил пропусти и при неговото приведување. Не била правилно утврдена правната основа за лишувањето од слобода, а документацијата не била соодветно пополнета. Дополнително, не бил извршен претрес во неговиот дом, ниту биле одземени електронските уреди.
Случајот бил преземен од Специјализираното државно обвинителство на 5 ноември, додека полициската управа документацијата ја доставила девет дена подоцна, што исто така било оценето како неправилност.
Последици имало и за дел од полициските службеници. Полицаец за кој било утврдено дека соработувал со лажниот полицаец добил предупредување пред отказ, а во март годинава бил отпуштен од работа поради друг дисциплински прекршок.
Предупредување пред отказ добил и командирот на полициската станица на аеродромот „Брник“, Јуре Лешњак, кој и понатаму останува на функцијата, како и уште неколку службеници.
Во меѓувреме бил сменет и директорот на Полициската управа Крањ, Урош Повалје. Од словенечката полиција, сепак, за СТА појасниле дека неговата смена не била директно поврзана со случајот, туку со пошироки организациски промени.
Извештајот предупредува дека пропустите можеле да доведат до неовластен пристап до обезбедени подрачја, загрозување на воздушниот сообраќај, но и до сериозни ризици за безбедноста на полицајците и полициските постапки.
Министерството предлага подобрување на системите за обработка на оперативни информации, зајакнување на внатрешно-безбедносните процедури и мерки за ограничување на препродажбата на полициска опрема.
Од Специјализираното државно обвинителство потврдиле дека е донесена обвинителска одлука против еден полицаец и против лицето кое се претставувало како полицаец, но засега не е соопштено каква е одлуката.
…
