Албанија и понатаму се соочува со сериозна состојба поради шумските пожари, со девет активни жаришта регистрирани во повеќе региони низ земјата.
Според информациите од Министерството за одбрана, пожари се регистрирани во областите Дебар, Тирана, Драч, Корча и Ѓирокастро. На терен се ангажирани околу 450 припадници на противпожарните служби, вооружените сили и други надлежни екипи.
Најголем број сили, околу 200 лица, се распоредени во областа Лура, во регионот Дебар, каде што продолжуваат интензивните напори за локализирање на пожарот и спречување на неговото понатамошно ширење.
Екипите се ангажирани и на останатите критични точки, а надлежните институции ја следат состојбата и ги координираат активностите за ставање на пожарите под контрола.
Засега нема официјална проценка за вкупната материјална штета предизвикана од огнените стихии.
Албанскиот претседател Бајрам Бегај упати благодарност до пожарникарите, припадниците на вооружените сили и сите други лица кои учествуваат во гаснењето на пожарите, особено во услови на високи температури.
Тој истовремено апелираше до граѓаните на зголемена внимателност и одговорност, а побара и строго санкционирање на лицата кои намерно предизвикуваат пожари.
„Сторителите кои ја палат земјата мора да бидат строго казнети согласно законот“, порача Бегај.
Надлежните ги повикаа граѓаните да ги почитуваат препораките и упатствата на институциите и да придонесат во заштитата на животите, имотот и природата.
…
