Во Македонија е регистриран првиот смртен случај од западнонилска треска годинава. Станува збор за 83-годишен маж од Скопје, кој бил лекуван на Клиниката за инфективни болести и фебрилни состојби.
Според информациите од Институтот за јавно здравје, првите симптоми кај пациентот се појавиле на 2 август. Тој имал покачена телесна температура, треска, главоболка, општа слабост, како и болки во зглобовите и мускулите.
Со влошувањето на состојбата се појавиле и посериозни симптоми – вкочанетост на вратот и нарушена свест. Кај пациентот била дијагностицирана и клиничка слика на менингитис.
Присуството на вирусот на западнонилска треска било потврдено со серолошко испитување на ликворот, односно цереброспиналната течност.
Од ИЈЗ информираат дека кај пациентот биле присутни и други здравствени состојби, што дополнително влијаело врз неговата клиничка состојба.
Западнонилската треска најчесто се пренесува преку убод од заразен комарец. Кај дел од заразените инфекцијата може да помине без симптоми или со блага клиничка слика, но во поретки случаи може да дојде до сериозни невролошки компликации, вклучително и менингитис или енцефалитис.
..
