Шест пожари на отворен простор во моментов се активни низ државата, додека три се ставени под контрола, информира Центарот за управување со кризи (ЦУК) во пресекот на состојбата до 13 часот.
Најсериозна е состојбата во општина Студеничани, каде гори мешана шума во регионот на селата Моране, Вртекица и Рамни Габер.
Пожар е активен и во општина Македонски Брод, на местото „Видуш“, во близина на селата Драгов Дол и Локвица, каде се зафатени ниска вегетација, нискостеблеста шума и грмушки.
Во општина Велес, кај селото С’лп, на местото „Горно Село“, гори ниска вегетација и ретка дабова шума. Шумски пожар има и во општина Јегуновце, во подрачјето на селата Копанце и Туденце, со ширење кон скопското село Бојане.
Пожар е регистриран и во општина Бутел, во Визбегово, каде се опожарени ниска вегетација и ѓубриште. Во Маврово-Ростуше, пак, пожарот е во регионот на селото Бибај, каде гори зимзелена шума, односно ела.
Три пожари се под контрола во општина Крушево. Станува збор за пожарите кај селата Борино и Житоше, во подрачјето на Алданци и Норово, како и во селото Селце. На овие локации се зафатени ниска вегетација и деградирана дабова шума.
Во текот на денот е регистриран и еден изгаснат пожар на територијата на Битола, во близина на селото Нижеполе, каде гореле ниска вегетација и бандера.
Директорот на Дирекцијата за заштита и спасување, Стојанче Ангелов, денеска предупреди дека бројот на пожари останува алармантен. Само во текот на вчерашниот ден биле регистрирани 27 пожари на отворен простор.
Ангелов ги повика доброволните пожарникари да ја следат состојбата во своите средини и, доколку проценат дека можат да помогнат во гаснењето и спречувањето на ширење на пожарите, да се обратат кај него за нивно ангажирање преку тимовите за брз одговор на ДЗС.
…
