Три нови случаи на западнонилска треска се потврдени во земјава, со што вкупниот број на регистрирани случаи сезонава достигна 34, информираат од Центарот за јавно здравје – Скопје.
Вирусот првпат сезонава е детектиран и кај жител на скопско Арачиново. Според епидемиологот Љуљзиме Бајрами од Центарот за јавно здравје – Скопје, во ова подрачје постојат услови кои може да придонесуваат за размножување на комарците, како канали, базени и застојани води.
Најголем број случаи досега се регистрирани во општините Кисела Вода и Аеродром, а речиси половина од сите случаи се поврзани со Драчево.
Бајрами посочува дека во иднина дезинсекцијата треба да започнува порано, но и дека е потребно да се анализира ефикасноста на средствата што се користат против комарците, односно да се утврди дали постои отпорност и, доколку е потребно, да се применат други препарати.
Во Македонија досега се регистрирани и два смртни случаи поврзани со западнонилска треска. Станува збор за пациенти на возраст од 72 и 83 години, кои покрај инфекцијата имале и повеќе хронични заболувања.
Поради зголемениот број случаи, Центарот за јавно здравје – Скопје на 12 август прогласи епидемија на западнонилска треска во повеќе скопски општини и населби. Мерката ги опфаќа Кисела Вода, Гази Баба, Аеродром, Бутел и Илинден, како и Драчево, Пржино, Долно Лисиче, Кадино и Јурумлери.
Здравствените власти продолжуваат со следење на состојбата, а граѓаните се предупредуваат да преземаат мерки за заштита од каснување од комарци, особено во периодите кога нивната активност е најголема.
