Најмалку 12 лица загинаа, а најмалку десет се здобиле со тешки повреди во тешка сообраќајна несреќа што се случила во текот на ноќта во Унгарија, откако полски туристички автобус излетал од автопатот М3 и се превртел.
Како што објави унгарската државна новинска агенција МТИ, информацијата утрово ја соопштил унгарскиот премиер Петер Маѓар.
Спасувачките служби по несреќата извлекле вкупно 35 повредени лица од автобусот.
Според информациите на унгарските медиуми и полицијата, во возилото во моментот на несреќата се наоѓале 57 патници и двајца возачи.
Автобусот се движел во правец кон Њиреѓхаза кога, од причини кои засега не се познати, излетал од автопатот и се превртел.
Спасувачките екипи веднаш биле упатени на местото на несреќата и започнале со извлекување на патниците од возилото, меѓу другото и преку прозорците на автобусот.
Дел од патниците биле заробени под превртеното возило, поради што спасувачката операција траела во текот на целото утро.
На местото биле ангажирани повеќе екипи кои работеле на извлекување на повредените и нивно пренесување за медицинска помош.
Делницата од автопатот М3 на која се случила несреќата била целосно затворена за потребите на увидот и истрагата.
Сообраќајот бил пренасочен во близина на Мезокерестес, додека надлежните служби работеле на расчистување на местото и утврдување на причините за трагедијата.
Засега нема официјални информации што точно довело до излетувањето и превртувањето на автобусот.
Истрагата за околностите под кои се случила несреќата е во тек.
