Македонскиот маратонец Дарио Ивановски го заврши настапот на Европското првенство во Бирмингем, освојувајќи го 46-то место во силната европска конкуренција.
Ивановски маратонската патека ја истрча за 2:22.39 часа, односно 13 минути и 28 секунди побавно од новиот европски шампион Аманал Петрос од Германија.
Македонскиот атлетичар добро ја отвори трката и во почетните километри успеваше да го одржува темпото, движејќи се во средината на главната група.
Сепак, најтешкиот период за Ивановски следуваше меѓу 15-тиот и 20-тиот километар, кога влезе во криза и загуби околу 20 позиции во поредокот.
На контролната точка на полумаратонот, по истрчани 21 километар, Ивановски забележа време од 1:09.28 час.
Во вториот дел од маратонот македонскиот репрезентативец успеа повторно да го стабилизира темпото, да го врати својот ритам и постепено да напредува во поредокот.
До самиот финиш успеа да надомести неколку позиции и на крајот ја мина целната линија како 46-ти.
Трката во Бирмингем се одвиваше во исклучително тешки услови, што го покажува и бројот на атлетичари кои не успеаја да стигнат до целта.
Од вкупно 60 пријавени маратонци, 52 ја завршија трката, седуммина се откажаа во текот на маратонот, додека еден натпреварувач воопшто не се појави на стартот.
Златниот медал и титулата европски шампион му припаднаа на Аманал Петрос од Германија, додека Ивановски со завршувањето на тешката маратонска трка го комплетираше својот настап на Европското првенство во Бирмингем.
