Фотографии и видеоснимки од потопената црква „Св. Никола“ во Маврово предизвикаа бурни реакции во јавноста, откако на нив се гледа како група туристи се качуваат директно на објектот облечени во костими за капење.
Граѓаните и локалното население реагираат дека ваквото однесување е недолично кон верскиот и културен споменик и дека храмот не смее да се третира како место за забава или туристички реквизит.
Преку социјалните мрежи е упатен јавен апел до Општина Маврово и Ростуше, Националниот парк, Министерството за внатрешни работи и Комуналната инспекција, од кои се бара итно да излезат на терен и да преземат мерки.
Граѓаните нагласуваат дека туристите се добредојдени во Маврово, но истовремено бараат задолжително почитување на верскиот објект, локалната традиција и чувствата на верниците.
Посебна загриженост предизвикува можноста качувањето по црквата дополнително да ја оштети конструкцијата, која и онака е во нарушена состојба.
„Поради качувањето по градбата, постои реален ризик од дополнително физичко оштетување на и онака нарушениот црковен објект. Се бара од градоначалникот, полицијата и инспекциските служби итно да излезат на терен, да утврдат дали има материјална штета и да ги казнат сторителите“, се наведува во една од реакциите што се споделуваат во јавноста.
Освен барањето за контрола и евентуални санкции, граѓаните предлагаат и воведување јасни правила за однесување околу црквата.
Меѓу предлозите се поставување предупредувачки табли, почести контроли и редовни патроли во близина на објектот, со цел да се спречат слични случаи во иднина.
Потопената црква „Св. Никола“ е еден од најпрепознатливите симболи на Маврово и со години привлекува голем број посетители, особено во периоди кога нивото на водата овозможува поголем дел од објектот да биде видлив и достапен.
Токму затоа, реакциите во јавноста се насочени кон потребата храмот да биде заштитен и како верски објект и како дел од културното наследство на регионот.
Граѓаните очекуваат надлежните институции да реагираат и да утврдат дали со последниот случај е нанесена материјална штета, како и да преземат мерки за да се спречи натамошно оштетување и непочитување на просторот.
ВИДЕО ПОГЛЕДНЕТЕ ГО НА 4NEWS.MK
