Националниот парк „Шар Планина“ упатува сериозен апел до граѓаните за максимална внимателност по пожарот што вчера избувна во местото Виноград, во подрачјето на КО Ѓурѓевиште, меѓу селата Ѓурѓевиште и Ломница.
Пожарот зафатил околу 0,5 хектари ниска вегетација и пасиште. За среќа, не е причинета поголема материјална штета, а со навремена интервенција на надлежните служби пожарот бил локализиран околу 22 часот.
Од Националниот парк посочуваат дека во услови на високи температури и исклучително сува вегетација, и најмал пожар за само неколку минути може да прерасне во сериозна закана за шумите, природата и блиските населени места.
Особена опасност претставува можноста огнот да се прошири кон тешко пристапните делови на Шар Планина, каде интервенцијата од земја е исклучително отежната, а во одредени ситуации невозможна без воздушна поддршка.
Според првичните сознанија, причината за пожарот е човечки фактор, а увид на местото извршиле полициски службеници. Опожарената површина катастарски е евидентирана како пасиште со кое управува Јавното претпријатие за пасишта и се наоѓа во границите на Националниот парк „Шар Планина“.
Од Националниот парк упатија благодарност до Дирекцијата за заштита и спасување и противпожарните единици од Гостивар, Боговиње и Тетово, кои со заедничка и навремена интервенција успеале да го стават пожарот под контрола.
„Не палете оган на отворено, не фрлајте отпушоци од цигари и не преземајте активности што можат да предизвикаат искра или пожар“, апелираат од Националниот парк.
Граѓаните, планинарите, посетителите, земјоделците и сточарите се повикуваат доколку забележат чад или пламен веднаш да го пријават случајот, додека пожарот сè уште може брзо да биде локализиран.
„Во вакви временски услови, доволна е една искра за последиците да бидат огромни. Одговорноста е заедничка“, порачаа од Националниот парк „Шар Планина“.
…
