Полицијата поднесе кривични пријави против три физички и едно правно лице од Прилеп за кои има основи дека го оштетиле буџетот на Тутунски комбинат Прилеп за над 3,3 милиони денари, односно околу 54.000 евра.
Првопријавениот Љ.Б., во 2021/2022 година работел во АД „Тутунски Комбинат“ – Прилеп на работно место координатор на група за обезбедување, а второпријавениот во истиот период бил генерален извршен директор на АД „Тутунски комбинат“. Третопријавениот Ј.Д. е сопственик и управител на четвртопријавениот правен субјект, овластена фирма за откуп и продажба на отпадни материјали со која АД „Тутунски комбинат“ Прилеп има склучено договор за откуп на отпадни материјали.
Во првото тримесечие на 2022 година, првопријавениот Љ.Б., спротивно на член 3 од Одлуката за одобрување на отпис од сметководствена евиденција и продажба на основни средства, ситен инвентар и резервни делови како отпадни материјали, по негов усмен предлог од тогашниот генерален извршен директор, второпријавениот К.С., му било овозможено тој да ја спроведе продажбата на отпад наместо референтот за управување со отпад. Во текот на февруари 2022, првопријавениот со помош на третопријавениот Ј.Д. прикриле најмалку 185.000 килограми отпадно железо од Работна единица Заводи – Мажучиште и не ја евидентирале на сметка на Тутунскиот комбинат, а била предадена и откупена од правното лице од селото Мало Коњари по повисока цена за два денари од килограм.
Но, наместо на сметката на АД Тутунски комбинат, од правното лице биле изготвени фиктивни откупни белешки за предадено отпадно железо во просек по околу 25.000 килограми по лице на име на осум физички лица (блиски лица на првопријавениот), со изјави за потеклото на отпадот. Парите биле префрлени на банкарски сметки на седум физички лица, како и на личната банкарска сметка на првопријавениот Љ.Б..
По префрлањето на парите на нивните трансакциски сметки во банки, тие ги подигнувале во готово и му ги предавале на првопријавениот. На ваков начин на сметките биле префрлени пари во вкупен износ од 3.338.328 денари и за тој износ е оштетен АД Тутунски комбинат Прилеп.
На Тутунски комбинат по основ на продажбата на отпадното железо, од правното лице од Мало Коњари исплатени се пари во вкупен износ од 1.274.560 денари.
СВР Битола поднесе кривична пријава против Љ.Б.(59) од Прилеп поради постоење основи на сомнение за сторени кривични дела „проневера во службата“, „злоупотреба на службената положба и овластување“ и „фалсификување службена исправа“, против К.С. (60) од Прилеп поради постоење основи на сомнение за сторено кривично дело „несовесно работење во службата“, како и против Ј.Д.(41) од Прилеп поради постоење основи на сомнение за сторени кривични дела „прикривање“ и „фалсификување службена исправа“. Пријава има и против правно лице од село Мало Коњари, Прилепско, поради постоење основи на сомнение за сторено кривично дело „прикривање“.
…
