Засилените сообраќајни контроли на Министерството за внатрешни работи вчера резултирале со 140 констатирани прекршоци и осум кривични пријави против возачи на велосипеди, мопеди и мотоцикли.
Контролите биле спроведени низ целата држава, во периодот од 17 до 22 часот.
Најголем дел од прекршоците, односно 102, се однесувале на управување без задолжително користење заштитен шлем – кацига. Полицијата регистрирала и двајца возачи кои управувале под дејство на алкохол.
Најмногу прекршоци биле евидентирани во подрачјето на СВР Струмица – 33. Следуваат СВР Тетово и Мобилната единица за безбедност на сообраќајот со 17 прекршоци, СВР Куманово со 15, додека СВР Битола и СВР Охрид регистрирале по 13.
Во СВР Велес биле констатирани 12 прекршоци, во СВР Скопје 11, а во СВР Штип девет.
За утврдените прекршоци полицијата презела соодветни мерки согласно Законот за безбедност на сообраќајот на патиштата. Против осум лица се поднесени и кривични пријави според член 297-а од Кривичниот законик.
Покрај прекршоците поврзани со возачите на велосипеди, мопеди и мотоцикли, при контролата биле регистрирани уште 156 прекршоци од друг вид.
Од МВР најавуваат дека засилените контроли ќе продолжат и во наредниот период, со цел зголемување на безбедноста во сообраќајот. Оттаму повторно апелираат до возачите да ги почитуваат сообраќајните правила, да користат соодветна заштитна опрема и никогаш да не управуваат со возило под дејство на алкохол.
