На денешното судење за трагичниот пожар во дискотеката „Пулс“ во Кочани, во фокусот на вкрстеното испрашување беше вештакот Горан Марковски, декан на Градежниот факултет во Скопје.
Во текот на испрашувањето, адвокатката на сопственикот на објектот, Гроздан Милковски, се обиде да ја поткрепи тезата дека објектот во 2012 година, кога бил даден под закуп на Дејан Јованов, бил во исправна и безбедна состојба.
Марковски потврди дека објектот тогаш бил производствен погон за лесна индустрија и дека ги исполнувал условите во однос на носивоста и противпожарната заштита.
На прашањето дали тоа значи дека во 2012 година објектот не претставувал опасност од пожар и дека неговата тогашна состојба не била причина за трагедијата што се случи на 16 март 2025 година, вештакот одговори потврдно.
Во продолжение, адвокатката праша дали сопственикот бил консултиран од закупецот за реновирањето и измените направени при претворањето на производствениот погон во дискотека, како и за материјалите што биле користени.
„Не бил прашан“, одговори Марковски.
Сепак, во продолжението на испрашувањето, вештакот посочи и на законската обврска при пренамена на објектот. Според него, согласно Законот за градење, барањето за пренамена го поднесува сопственикот на објектот.
Марковски нагласи дека меѓусебните усни или писмени договори меѓу сопственикот и закупецот не можат да ги заменат законските обврски предвидени со Законот за градење.
Испрашувањето на вештакот продолжува, а неговиот исказ е еден од доказите на кои внимание посветуваат и обвинителството и одбраната.
За пожарот во дискотеката „Пулс“, кој избувна на 16 март 2025 година, обвинети се 34 лица. Во трагедијата животот го загубија 63 лица, а повеќе од 200 беа повредени.
…
