Во Москва сè почесто се разгледуваат сценарија за дополнителна ескалација на војната во Украина, а според извори на Bloomberg, дел од руските функционери не ја исклучуваат ниту можноста претседателот Владимир Путин, како крајна опција, да прибегне кон употреба на тактичко нуклеарно оружје.
Според информациите што ги пренесува Bloomberg, преговорите за запирање на војната практично стигнале до ќор-сокак, бидејќи Путин не покажува подготвеност за отстапки.
Изворите наведуваат дека Кремљ сега се подготвува за нова фаза на ескалација на конфликтот.
Меѓу опциите што, според извештајот, се разгледуваат е засилување на нападите врз Киев, како и врз инфраструктурни објекти во други украински градови.
Најзагрижувачкиот дел од информациите се однесува на проценките на одредени руски функционери дека, доколку ситуацијата дополнително се влоши и Москва оцени дека нема други опции, Путин би можел да размислува и за употреба на тактичко нуклеарно оружје.
Сепак, засега нема официјална потврда од Кремљ дека е донесена каква било одлука за употреба на нуклеарно оружје.
Не е познато ниту дали таквото сценарио се разгледува како реална оперативна опција на највисоко ниво или станува збор за проценки и стравувања на дел од функционерите во руското раководство.
Тактичкото нуклеарно оружје е наменето за употреба на бојното поле или против ограничени воени цели и обично има помала разорна моќ од стратешките нуклеарни боеви глави.
Сепак, евентуалната негова употреба би претставувала драматична ескалација на војната и би можела да предизвика сериозни меѓународни последици.
Информациите доаѓаат во момент кога дипломатските напори за приближување на позициите меѓу Москва и Киев, според Bloomberg, не донеле напредок, а можноста за ново засилување на борбите повторно станува едно од главните прашања околу натамошниот тек на војната.
