Еден работник на аеродромот во Франкфурт починал од маларија, откако најверојатно бил каснат од заразен комарец кој пристигнал со авион од подрачје каде што болеста е присутна.
Случајот предизвика загриженост кај германските здравствени власти, особено откако било потврдено дека вкупно шестмина вработени на аеродромот се заразени со маларија. Петмина од нив се хоспитализирани.
Според германските здравствени служби, постои сомневање дека заразените комарци можеби пристигнале со авион на аеродромот во Франкфурт, еден од најпрометните воздушни центри во Европа.
Поставени специјални замки за комарци
По појавата на инфекциите, на аеродромот биле поставени специјални замки за комарци. Фатените инсекти ќе бидат испратени на лабораториски анализи за да се утврди за кој вид станува збор и дали се носители на паразитот што ја предизвикува маларијата.
Маларијата најчесто се пренесува преку каснување од заразен комарец. За разлика од некои други заразни болести, таа вообичаено не се пренесува директно од човек на човек.
Појавата на повеќе случаи на едно место во Европа е релативно невообичаена и затоа здравствените власти се обидуваат да ја утврдат точната причина за инфекциите.
Од „Фрапорт“, операторот на аеродромот, соопштиле дека вработените биле информирани за ситуацијата и дека на сите кои ќе почувствуваат симптоми им се препорачува веднаш да побараат медицинска помош.
Здравствените служби продолжуваат со истрагата за да утврдат како заразените комарци евентуално стигнале до аеродромот, од каде потекнуваат и дали постои ризик од појава на дополнителни случаи.
…
