Црногорската полиција уапси 22-годишен маж од Беране под сомнение дека со автомобил го усмртил своето едногодишно дете, а потоа се обидел да ја прикрие трагедијата тврдејќи дека детето паднало од покрив на монтажен објект.
Случајот бил пријавен вчера околу 16 часот, кога Брзата помош во Беране ја известила полицијата дека во здравствената установа било донесено едногодишно дете со тешки повреди, кое набргу починало.
Полициски службеници веднаш пристигнале во болницата, каде го утврдиле идентитетот на детето и разговарале со неговиот татко, А.И. (22).
Тој првично изјавил дека детето се здобило со смртоносните повреди откако паднало од покривот на помошен монтажен објект.
Меѓутоа, по деталниот увид и истрагата која траела во текот на ноќта, полицијата утврдила дека неговата верзија не се совпаѓа со собраните докази.
Според досега утврденото, постои сомнение дека таткото, додека со автомобил излегувал од гаража, го удрил едногодишното дете, кое од здобиените повреди починало.
Телото на детето е испратено на обдукција во Клиничкиот центар на Црна Гора, додека автомобилот е привремено одземен и ќе биде предмет на дополнителни вештачења.
По налог на обвинител од Основното државно обвинителство во Беране, 22-годишниот татко е уапсен под сомнение дека сторил кривично дело „тешки дела против безбедноста на јавниот сообраќај“.
Истрагата за трагичниот случај продолжува.
