Вистинска драма се одвивала во Унгарија откако 24-годишен маж украл мал авион „Цесна 172“ од аеродромот во Калоча и без дозвола полетал во правец на нуклеарната централа „Пакш“.
Сомнителниот лет речиси веднаш бил забележан од радарите на унгарските вооружени сили, по што во воздух биле кренати два борбени авиони ЈАС 39 „Грипен“ со задача да го пресретнат леталото.
Причина за итната реакција е фактот што „Пакш“ е единствената нуклеарна централа во Унгарија и претставува објект под посебен режим на заштита. Околу централата постои зона со радиус од три километри во која летовите на цивилни авиони се забранети на височина под 6.000 метри.
Според унгарските медиуми, авионот се движел кон подрачјето на Пакш, а дел од извештаите наведуваат дека леталото навлегло во близина на заштитениот воздушен простор и изведувало маневри.
Инцидентот, сепак, завршил без жртви. Само неколку минути подоцна, пилотот бил принуден да изврши итно слетување во поле со сончоглед во близина на селото Герјен. При слетувањето била оштетена опремата за слетување, а авионот завршил навален на едното крило.
„Грипените“ го лоцирале оштетениот авион и останале над местото сè додека не пристигнале спасувачки хеликоптер, полицијата и другите итни служби.
Унгарската полиција соопшти дека зад управувачот бил 24-годишен маж, кој, според првичните информации, бил во алкохолизирана и растроена состојба. По принудното слетување тој го напуштил авионот, а набргу потоа бил приведен.
Во инцидентот нема повредени, а нуклеарната централа не претрпела никаква штета.
Полицијата и надлежните безбедносни служби сега истражуваат како мажот успеал да го украде авионот, која била неговата намера и дали, покрај алкохол, бил под дејство и на други супстанции.
