Политичката партија ВЛЕН бара од Демократската унија за интеграција (ДУИ) да се изјасни за неодамнешните изјави на Г’зим Острени во врска со Охридскиот рамковен договор и улогата на Али Ахмети.
Од ВЛЕН велат дека по вчерашната прес-конференција, на која јавно биле отворени прашањата поврзани со изјавите на Острени, од ДУИ сè уште нема одговор.
Од партијата оценуваат дека ДУИ не може да молчи за изјавите на, како што наведуваат, една од клучните фигури од 2001 година, особено затоа што тие се однесуваат на третманот на албанскиот јазик во Охридскиот рамковен договор.
„Ако Али Ахмети не се согласува со изјавите на Г’зим Острени, нека излезе јавно и нека објасни што од неговите изјави не е точно“, порачаа од ВЛЕН.
Според ВЛЕН, Острени јавно изјавил дека во периодот кога Али Ахмети ја водел политичката игра, албанскиот јазик не бил внесен во Уставот со своето име. Од партијата додаваат дека Острени посочил оти дури години подоцна разбрал дека уставната формулација не се однесува директно на „албанскиот јазик“, туку на јазикот на заедницата која сочинува повеќе од 20 проценти од населението.
„Ова не е тврдење на ВЛЕН. Ова го кажа Г’зим Острени“, наведуваат од партијата.
ВЛЕН бара ДУИ да одговори дали ги негира овие ставови. Доколку не ги негира, од партијата бараат Али Ахмети да објасни како, според нив, од првичните барања во 2001 година се стигнало до уставно решение во кое албанскиот јазик не е наведен со своето име.
Од ВЛЕН порачуваат дека ДУИ треба јавно да одговори на прашањето: „Дали Али Ахмети го негира Г’зим Острени – да или не?“
…
