Иран испрати ново остро предупредување до Соединетите Американски Држави, откако претседателот на иранскиот парламент, Мохамед Багер Галибаф, порача дека Техеран повеќе нема да одговара на евентуалните напади на досегашниот начин.
Галибаф пред иранските пратеници изјави дека „правилата на играта се променети“ и предупреди дека секој напад врз иранските интереси и безбедност во иднина ќе биде проследен со побрз и посилен одговор.
„Симетричните одговори се минато, а нашите напади врз базите на агресорот за време на последните операции беа само почеток“, рече Галибаф.
Тој упати директна порака до Вашингтон да ја разбере новата позиција на Техеран, предупредувајќи дека во спротивно последиците би можеле да бидат посериозни.
„Отсега па натаму, секој напад врз интересите и безбедноста на Иран ќе биде пресретнат со побрз, поостар и поболен одговор“, порача претседателот на Меџлисот.
Предупредувањето доаѓа по серијата воени дејствија меѓу САД и Иран. Американската Централна команда на 1 септември соопшти дека биле извршени напади врз цели во Иран. Иранските медиуми објавија дека експлозии биле регистрирани на јужниот брег на земјата, меѓу кои и на островот Кешм, како и во неколку други градови.
Од Техеран потоа тврдеа дека иранските сили возвратиле со напади врз американски воени бази во Обединетите Арапски Емирати, Јордан, Ирак и Бахреин.
Изјавите на Галибаф дополнително ги зголемуваат тензиите меѓу Техеран и Вашингтон, во момент кога двете страни разменуваат остри закани и предупредувања за можни нови воени дејствија.
