Траен мировен договор меѓу Русија и Украина тешко може да биде постигнат додека Владимир Путин е на власт во Москва, смета поранешниот шеф на британската надворешна разузнавачка служба МИ6, Џон Сојерс.
Во разговор за „Фајненшел тајмс“, Сојерс оцени дека шансите до крајот на 2027 година да биде постигнат сеопфатен мировен договор се мали. Според него, во сегашните услови најреално е евентуално намалување на интензитетот на конфликтот до ниво слично на периодот по 2014 година.
Сојерс позитивно гледа на продолжувањето на контактите меѓу Вашингтон и Кремљ, но изрази скептицизам дека американските претставници во моментов можат да постигнат значаен договор. Како главна пречка ги посочи непроменетите барања на Путин, кои според него се неприфатливи за Киев и Западот.
Сепак, поранешниот шеф на МИ6 смета дека во 2027 година би можел да се отвори простор за сериозни преговори за прекин на огнот. За тоа, според него, потребно е Русија и Украина да почувствуваат сè поголеми економски и воени последици од продолжувањето на конфликтот, а руските сили да ја изгубат способноста за натамошно напредување на фронтот.
Сојерс забележал и дека во Русија се појавуваат сè повеќе гласови кои го преиспитуваат продолжувањето на војната и повикуваат на изнаоѓање излез од конфликтот.
Неговите оценки доаѓаат во период на засилена американска дипломатска активност. Американските претставници Стив Виткоф и Џаред Кушнер на 5 септември пристигнаа во Москва со предлог за прекин на војната, а по разговорите во Русија се очекува нивна посета и на Киев.
Сепак, очекувањата за успех на разговорите остануваат ниски. „Блумберг“ претходно објави дека во Кремљ не гледаат доволно причини да веруваат дека Вашингтон овојпат има предлози што Москва би била подготвена да ги прифати.
Во меѓувреме, поранешниот директор на ЦИА оцени дека Украина претставува „воена лабораторија на 21 век“, нагласувајќи ја сложеноста и значењето на актуелниот конфликт за современото војување.
…
