Google најави инвестиција од најмалку 13 милијарди евра во Финска во следните две години, со која ќе ја прошири инфраструктурата за вештачка интелигенција, дата-центри и чиста енергија.
Ова е најголемата поединечна инвестиција на технолошкиот гигант во Европа досега. Проектот е планиран за реализација во периодот од 2027 до 2028 година и предвидува изградба на најмалку три нови дата-центри, како и проширување на постојниот голем центар на Google во крајбрежниот град Хамина.
Новите центри ќе бидат изградени во Кајани, Мухос и Вала, во северниот дел на Финска. Локациите се избрани поради близината до електроенергетската мрежа и достапноста на електрична енергија со ниски емисии на јаглерод.
Инвестицијата ќе опфати и подобрувања на електричната мрежа, проекти за чиста енергија и батериски системи, со цел да се обезбеди потребната инфраструктура за услугите на Google, меѓу кои Gemini, Search, Maps и YouTube.
Новите дата-центри ќе бидат проектирани и за системи за обновување и користење на отпадната топлина. За поврзувањето на објектите ќе бидат ангажирани телекомуникацискиот оператор Elisa и Nokia.
Од Google проценуваат дека инвестицијата во текот на изградбата ќе поддржи повеќе од 37.000 работни места низ Финска, од кои околу 16.000 во градежниот сектор. Кога центрите ќе бидат целосно оперативни, се очекува годишно да поддржуваат околу 7.000 работни места и да придонесуваат со 3,6 милијарди долари во финскиот БДП.
Паралелно со изградбата на дата-центрите, Google обезбедува и дополнителни извори на електрична енергија.
Компанијата потпиша 22-годишен договор со финската државна енергетска компанија Fortum за откуп на до 50 отсто од капацитетот на нуклеарната централа Ловииса. Ова е првиот договор на Google за нуклеарна енергија надвор од САД.
Google планира дополнителни договори за користење на енергијата од ветерни паркови, а во Кајани ќе инсталира и батериски систем со капацитет од 94 мегавати за балансирање на електроенергетската мрежа.
Од Fortum оценија дека долгорочниот договор со Google обезбедува економска сигурност за продолжување на работниот век и модернизација на нуклеарната централа Ловииса до 2050 година. Централата се наоѓа во близина на дата-центарот на Google во Хамина.
Главната инвестициска директорка на Google, Рут Порат, истакна дека договорот за нуклеарна енергија претставува значаен чекор за компанијата.
Финскиот премиер Петери Орпо, пак, оцени дека инвестицијата е доказ за силните страни на Финска и ќе има пошироки економски ефекти врз земјата.
Една од главните причини поради кои Google ја избра Финска е студената клима, која овозможува поефикасно и поевтино ладење на серверите. Дополнителна предност е достапноста на стабилна електрична енергија со ниски јаглеродни емисии.
Зголемената побарувачка за вештачка интелигенција доведе до значително зголемување на потребите за компјутерска моќ и електрична енергија, поради што технолошките компании ширум Европа вложуваат милијарди во нови дата-центри и енергетска инфраструктура.
Google, односно матичната компанија Alphabet, годинава ги зголеми планираните глобални капитални инвестиции на меѓу 195 и 205 милијарди долари.
Компанијата паралелно најавува и други големи проекти во Европа, вклучително и изградба на нови дата-центри во Холандија и Белгија.
