Поранешниот британски премиер Борис Џонсон и повеќе германски политички претставници патувале со специјален воз кој се нашол во опасната зона за време на рускиот напад во близина на украинско-полската граница, објавија германските медиуми.
Според „Билд“, кој се повикува на информации на „Шпигел“, во возот бил и Гинтер Заутер, советник за надворешна и безбедносна политика на германскиот канцелар Фридрих Мерц. Со него патувале и други европски функционери, дипломати и пратеници кои претходно престојувале во Киев.
Меѓу германските претставници бил и пратеникот на Зелените во Бундестагот, Робин Вагенер. Делегацијата се враќала од Украина по средби со претставници на украинските власти и учество на меѓународна конференција во Киев.
Возот бил запрен во близина на граничниот премин Јаходин–Дорохуск по предупредување за напад со руски беспилотни летала. Патниците биле евакуирани навреме и, според достапните информации, никој не бил повреден.
Истовремено, руски дрон ја погодил локомотивата на патничкиот воз што сообраќал на линијата Киев–Варшава, на околу два километри од границата со Полска. Украинската железница соопшти дека машиновозачот, останатиот персонал и патниците успеале да го напуштат возот пред ударот.
Медиумските извештаи прават разлика меѓу погодениот патнички воз и специјалниот воз со странските претставници, кој исто така бил евакуиран откако се нашол во зоната на нападот. „Фајненшл тајмс“ објави дека локомотивата била одвоена од остатокот од композицијата пред да биде погодена и дека немало жртви.
Полските и украинските власти информираа и за напад врз камион и инфраструктура во близина на преминот Дорохуск–Јаходин. Работата на граничниот премин била привремено прекината, а потоа повторно воспоставена.
Поради близината на нападите до територијата на Полска, полските вооружени сили ја зголемиле борбената готовност и активирале авиони и системи за надзор на воздушниот простор.
Украинскиот министер за надворешни работи Андриј Сибиха го нарече нападот „терор на Путин кој тропа директно на вратите на Европската Унија и НАТО“. Тој ги повика партнерите на Киев да го засилат притисокот врз Москва и да воведат дополнителни санкции против рускиот воено-индустриски комплекс.
Германскиот пратеник Робин Вагенер го оцени нападот како чин на „слеп терор“, предупредувајќи дека војната сè повеќе се приближува до границите на ЕУ и НАТО.
