Американскиот претседател Доналд Трамп го повика украинскиот претседател Володимир Зеленски да ги прекине нападите врз руските рафинерии и другите капацитети поврзани со производството на дизел-гориво, оценувајќи дека тие придонесуваат за недостигот и растот на цените на светскиот пазар.
„Зеленски мора да престане да го уништува дизел-горивото во Русија. Постојат многу други цели. Не го напаѓајте дизелот, тоа му штети на светот“, изјави Трамп пред новинарите за време на посетата на голф-турнирот „Ајриш опен“ во Ирска.
Трамп откри дека за ова прашање веќе разговарал со украинскиот претседател. Според него, актуелниот недостиг на дизел не е предизвикан првенствено од случувањата на Блискиот Исток, туку од војната меѓу Русија и Украина.
Украина во изминатите месеци ги засили нападите со беспилотни летала со долг дострел врз руските рафинерии, складишта за гориво и друга енергетска инфраструктура. Нападите го намалија рускиот капацитет за преработка на нафта и предизвикаа недостиг и ограничувања во снабдувањето со гориво во делови од земјата.
Киев тврди дека рафинериите се легитимни воени цели бидејќи приходите од рускиот енергетски сектор ја финансираат војната, додека произведеното гориво директно се користи за снабдување на руските вооружени сили. Дизелот е особено значаен за тенковите, оклопните и транспортните возила, железничката логистика и останатата механизација што ја поддржува руската копнена офанзива.
Прекинот на производството во руските рафинерии има последици и врз меѓународниот пазар, бидејќи Русија е еден од големите светски производители и извозници на нафтени деривати. Москва веќе ја намали прогнозата за производство на нафта на најниско ниво во последните 17 години и ги ревидираше очекувањата за извозот на гориво за 2026 и 2027 година.
Просечната цена на дизелот во САД неделава првпат надмина шест долари за галон. Поскапувањето директно ги погодува транспортниот и земјоделскиот сектор, а преку повисоките трошоци за превоз може да влијае и врз цените на храната и другите производи.
Сепак, енергетските анализи покажуваат дека притисокот врз цените не доаѓа само од украинските напади врз руските рафинерии. Врз глобалната понуда влијаат и војната со Иран, нарушувањата на транспортните патишта на Блискиот Исток и намалените резерви на дизел и сурова нафта.
Барањето на Трамп го става Киев пред чувствителна одлука: да ги ограничи нападите врз инфраструктурата што е клучна за снабдувањето на руската армија или да ризикува дополнителни несогласувања со Вашингтон поради глобалните економски последици.
