Околу 200 жители и туристи беа принудени да ги напуштат домовите и сместувачките објекти откако голем пожар се прошири на хрватскиот остров Брач. Евакуираните лица биле пренесени и згрижени во прифатни центри во Супетар и Постира.
Најкритична била состојбата во околината на Милна, каде што поради приближувањето на огнот била издадена наредба за евакуација. Дел од туристите ја поминале ноќта на тамошната рива, чекајќи потврда дека опасноста е намалена и дека можат безбедно да се вратат во своите апартмани и домови.
Размерите на пожарот се забележани на забрзана временска снимка што ја објави „Ватрогасци 193“. Видеото го опфаќа периодот од 22 часот до разденувањето и покажува како огнот постепено освојува големи површини, а пламените јазици се издигнуваат над островот.
Пожарот можел да се забележи од повеќе населени места на Брач. Во текот на целата ноќ, противпожарните екипи се обидувале да го запрат неговото ширење кон куќите и останатите објекти.
Борбата со огнената стихија траела до раните утрински часови, при што главен приоритет на пожарникарите биле заштитата на населението и одбраната на загрозените населени подрачја.
