Руски дрон ја погодил локомотивата на евакуиран патнички воз во близина на граничниот премин Јаходин–Дорохуск, на само два километра од границата меѓу Украина и Полска.
Нападот се случил само неколку минути откако низ истото подрачје поминал друг воз во кој патувале европски политичари, дипломати и други високи претставници што се враќале од меѓународната конференција „Јалта европска стратегија“ во Киев.
Поранешниот шведски премиер Карл Билт, кој бил дел од делегацијата, потврди дека погодената композиција не била возот во кој патувал тој.
„Ова не беше нашиот воз, туку оној само неколку минути зад нас“, објави Билт, додавајќи дека патниците биле навреме евакуирани и дека безбедносниот систем функционирал добро.
Украинските служби претходно добиле предупредување за претстојниот воздушен напад. Патниците и железничкиот персонал веднаш биле изнесени на безбедно, а локомотивата била одвоена од остатокот од композицијата. Дронот потоа ја погодил локомотивата, но во нападот немало повредени.
На самитот во Киев присуствувале и поранешниот британски премиер Борис Џонсон, советникот за надворешна и безбедносна политика на германскиот канцелар Фридрих Мерц, Гинтер Заутер, како и повеќе германски пратеници, дипломати и претставници на други западни земји.
Засега, сепак, нема потврда дека Борис Џонсон се наоѓал во возот со кој патувал Карл Билт. Достапните информации потврдуваат дека тој бил во Киев за време на конференцијата, но не и дека бил во композицијата што ја поминала границата непосредно пред нападот.
Руските напади во граничното подрачје предизвикале привремен прекин во работата на преминот Дорохуск–Јаходин. Полска ги активирала своите одбранбени капацитети и го засилила надзорот над воздушниот простор поради близината на ударите до територијата на НАТО.
Украинскиот министер за надворешни работи Андриј Сибиха го оцени нападот како „терор на Путин кој тропа на вратите на ЕУ и НАТО“ и ги повика западните партнери да го зголемат притисокот врз Москва.
Инцидентот предизвика дополнителна загриженост бидејќи железничката линија Киев–Варшава редовно ја користат странски државници, дипломати и делегации кои патуваат во Украина. Нападот се случил во рамки на голем руски воздушен бран насочен кон повеќе делови од земјата.
