Американската армија започнува со воведување нов систем за борба против беспилотни летала, кој наместо ракети користи високоенергетски ласер. Станува збор за системот LOCUST X3, наменет за откривање, следење и уништување дронови.
За сериско производство на системите е склучен договор со компанијата AeroVironment во вредност од околу 465 милиони долари. Од американската армија наведуваат дека станува збор за прв договор за сериско производство на високоенергетско ласерско оружје во историјата на американските копнени сили.
Една од главните предности на технологијата е значително пониската цена на секое дејство. Според производителот, едно ласерско дејство може да чини помалку од пет долари, што е драстично помалку од употребата на класични ракети за противвоздушна одбрана.
LOCUST X3 располага со ласер со моќност од околу 30 киловати. Откако системот ќе го открие и следи дронот, ласерскиот зрак се насочува кон критичните компоненти на леталото, со цел да ги оштети и да предизвика негово соборување.
Дополнителна предност е тоа што системот не користи физичка муниција. За разлика од ракетните системи, кои по истрелувањето мора повторно да се наполнат, ласерот може да продолжи да дејствува додека има доволно електрична енергија.
Американската армија веќе тестира високоенергетски ласерски системи во реални услови. Во август, според достапните информации, со ваква технологија биле соборени три дрона во близина на американско-мексиканската граница.
Развојот и воведувањето на ваквите системи е дел од пошироките напори на САД да ја зајакнат одбраната од беспилотни летала. Дроновите имаат сè поголема улога во современите конфликти, поради што армиите ширум светот бараат поефикасни и поевтини начини за нивно неутрализирање.
Со LOCUST X3, американската армија се обидува да понуди токму такво решение – систем кој може повеќекратно да дејствува против дронови со значително помали трошоци во споредба со традиционалните ракети.
…
