Регулаторната комисија за енергетика ги утврди новите максимални малопродажни цени на нафтените деривати, кои ќе почнат да важат од 00:01 часот на 15 септември.
ЕУРОСУПЕР БС-95 ќе се продава по максимална цена од 100,50 денари за литар, додека ЕУРОСУПЕР БС-98 ќе чини 102,50 денари за литар. Двата вида бензин поскапуваат за 3,50 денари по литар.
Од друга страна, цената на ЕУРОДИЗЕЛ се намалува за два денари и од досегашните 101 денар ќе изнесува 99 денари за литар.
Екстра лесното масло за домаќинство поскапува за 4,50 денари и од полноќ ќе се продава по максимална цена од 109,50 денари за литар.
Зголемување има и кај мазутот, чија цена е утврдена на 48,243 денари за килограм.
Според пресметките на Регулаторната комисија, малопродажните цени на нафтените деривати во просек се зголемуваат за 2,86 проценти во однос на претходната одлука од 7 септември.
Како главна причина за новото ценовно движење се наведува растот на референтните цени на горивата на светските берзи.
Кај дизелот е применета повластена стапка на ДДВ од 10 проценти, согласно одлуката на Владата од 13 септември. Во сила продолжува и примената на намалената акциза за бензините и дизелот.
Новите цени ќе важат од 00:01 часот на 15 септември.
