Пентагон за првпат официјално призна дека војната со Иран предизвикала недостиг на муниција во американските стратешки залихи, како и проблеми со брзото надополнување на резервите.
Во извештајот објавен од главниот инспектор на американското Министерство за одбрана се наведува дека потребите за муниција за време на операцијата „Епски гнев“ довеле до намалување на стратешките резерви и откриле ограничувања во капацитетите на американската одбранбена индустрија.
„Потребите за муниција за време на операцијата ‘Епски гнев’ доведоа до недостиг во стратешките залихи и открија пречки за индустријата за пополнување на муницијата“, се наведува во извештајот.
Документот истовремено ги опишува и мерките што ги презело Министерството за одбрана со цел да го зголеми производството и побрзо да ги надополни потрошените резерви.
Признанието доаѓа неколку месеци откако американската администрација категорично ги отфрлаше информациите дека Вашингтон има проблеми со залихите на муниција.
Во јуни, американските медиуми објавија дека САД го ограничуваат користењето на одредени ракети, особено пресретнувачките, поради намалувањето на резервите. Тогаш администрацијата на Доналд Трамп ги демантираше таквите наводи.
И самиот Трамп тврдеше дека САД располагаат со огромни количества муниција. На почетокот на овој месец тој повторно порача дека земјата има „практично неограничени количества муниција“.
Сепак, најновиот извештај на Пентагон сега потврдува дека во текот на операцијата против Иран дошло до притисок врз американските стратешки резерви.
Американските медиуми во меѓувреме објавуваат дека токму ограничените залихи на муниција биле еден од факторите поради кои Трамп не се одлучил за продолжување на масовните напади врз Техеран во текот на летото.
Признанието на Пентагон отвора и пошироко прашање за способноста на американската одбранбена индустрија брзо да ги надополни залихите доколку САД повторно бидат вклучени во долготраен конфликт со висока потрошувачка на муниција.
…
